Escritor

Foi considerado o primeiro escritor universal en lingua catalá e o creador do catalán literario; porén, entende a literatura en catalán, non como un fin en si mesmo, senón como un medio para chegar a un público laico e urbano que non coñece o latín. Pero ao escribir na súa lingua, ábrea por primeira vez a todas as posibilidades do pensamento científico e da especulación filosófica e teolóxica.

O seu é un catalán con deixes provenzais, herdanza probablemente dos seus poemas de amor xuvenís, escritos nesa lingua. Llull é un destacado ensaísta e novelista e, como poeta, emprega as técnicas líricas trobadorescas para finalidades divulgativas. Cando escribe non só emprega letras, senón tamén símbolos, táboas, figuras xeométricas e ilustracións diversas; é pois, dalgún modo, deseñador gráfico das súas obras. Creou diversos neoloxismos.

Foi extraordinariamente prolífico: atribúenselle 265 obras que escribiu en catalán, latín e árabe.